إصطبحنا و إصطبح الملك لله!!!!أ :)

كل واحد فينا بيبقى ليه شكل هو او هى عارفينه لما بيصحى من النوم,وغالبا مودنا بتاع اليوم كله بيتحدد انا ازاى صحيت النهارده ,وأحيانا كتير قوى بيبقى على حسب انا حصلى ايه اخر حاجه قبل النوم.

و فى الحاله دى سهل ان الواحد يعمل اى حاجه جميله قبل ما ينام او لما يصحى يحاول يصحى بشكل لطيف على صوت حد بيحبه او على لمسة حنيه من حد جنبه اكيد هيصحى مستبشر و كله هيبقى تمام...أصل الناس مش غاويه نكد بس الناس احيانا بتتلككك على الضيق

يبقى احنا نبطل الحجج و نظبط الموضوع ده بكل بساطه.ه

كل ده جميل قوى و أحيانا بيبقى منطقى السبب الى ممكن نكون صاحيين مضايقين بسببه,م

...

بس تفتكروا لو انا قمت من النوم متضايق بس مش عارف ليه و من إيه و ما حصلش حاجه بس انا برضه متضايق و مخنوق و مش عايز حتى اقوم من النوم._..أكيد بتحصلنا كلنا فى ايام مش قليله_؟

فى الحاله دى ندور فى الذكريات الاقدم شويه احيانا الواحد لا اراديا بيفتكر حاجه و هو صاحى كويس بتكون قديمه اه بس ممكن تقلب عليه زعل..بس برضه لازم يفكر و يقول ان الحاجه دى خلصت و اجمل حاجه ان الوقت بيمر و ما فيش حاجه بتبقى على حالها والاهم ان الحاجات الوحشه الى بتحصلنا هيجى عليها يوم نلاقى فيها حاجه ممكن تكون من اجمل الحاجات الى حصلت فى حياتنا و لو حتى اننا اتعلمنا منها.ه

لو صحيت بقى من النوم متضايق و مفيش حاجه لا قديم و لا جديد يبقى لازم تعمل اى حاجه حلوه انت بتحبها .كلم حد بتحبه و لو بتحبه بجد هيبقى كافى التفكير فيه بس انه هيخليك مرتاح و مبسوط

فكر ان الدنيا بجد فيها حاجات كتير جميله قوى و مشاعر اجمل من اننا ننساها..

فكر انك اكيد فيك او عندك ميزه او نعمه مش موجوده عند حد او مجرد انك موجود عندك الى موجود عند اغلب الناس و من غير اساسا ما تقارن ربنا سبحانه و تعالى مدى كل الناس نصيبهم بالشعره و لو حتى احنا مش شايفين كده لتباين المعايش بتاعة الناس بس برضه ربنا اعلى و اعلم و مقسم النعم علينا بشكل لازم نحمده عليها ليلا و نهارا..ه

فكر انك مهما كنت شايف الحاجات الكويسه الى فى الدنيا قليله فيكفى انها موجوده و لو قليله, لان بجد فيه ناس كتير للاسف مش شايفه الحاجه البسيطه دى

و كل واحد فينا عارف ايه الى ممكن يبسطه بس بيكسل يعمله او يقول اجيب وقت منين

انا اعرف واحده كده من بعيد معرفه سطحيه يعنى خااالص فضلت تقول عايزه اروح حديقةالازهر قبل ما تسافر لحد ما سافرت و جت و لسه برضه لسه ما راحتهاش مع انها عارفه انها نفسها قوى تروحها و هتبسط بجد فيها قوى بس الكسل عن ان الواحد يعمل لنفسيته و لتحسين حياته بيخلى الواحد يقعد يقول انا نفسى بس ما بيحققش

و كل الناس بتعمل لنفسها بس محدش بيعمل لنفسيته مع إن النفسية بتاعتنا اهم من اى شىء كل ما كان الواحد مبسوط و مرتاح كلما ادى الدنيا و الناس و لنفسه اكتر بكتير..ه

جربوا تعملو لنفسيتكم من حين لاخر هتلاقوا الدنيا بقت اجمل و هنصحى من النوم واحنا ضحكتنا من الودان للودان مهما كان عندنا مشاكل

و كل واحد صحته النفسيه فى ايده مش فى ايد حد او فى ايد اى ظروف اخرى عشان الى عايز يبقى كويس هيبقى كويس غصب عن اى مؤثرات أخرى..ه

يالا بقى معلش طولت عليكم

انا هقوم بقى عشان ورايا مشوار احتمال كده لحد حديقة الازهر :)

يا إما هقعد افكر كالعاده و اقول يا ترى هروح لوحدى و لا اروح مع مين؟؟؟!!!!!!ه